"ნაპოლიმ" შესაძლოა კოკა-კოლას უჩივლოს

მიმდინარე წლის 8 მაისს Coca-Cola-ს ეტიკეტზე Napoli-ს გარემარბი და საქართველოს ნაკრების ფეხბურთელი ხვიჩა კვარაცხელია გამოჩნდა. გავრცელებული ინფორმაციით, „კოკა კოლა ბოთლერს ჯორჯიამ" Coca-Cola-ს ახალი შეფუთვით წარმოება UEFA-ს 21-წლამდელთა ევროპის ჩემპიონატისა და ეროვნული ნაკრების მხარდასაჭერად დაიწყო.

რამდენიმე დღეა ქართული და იტალიური მედია წერს, რომ ხვიჩა კვარაცხელიას Coca-Cola-ს ეტიკეტზე გამოჩენამ იტალიური საფეხბურთო გუნდ Napoli-ს პროტესტი გამოიწვია. რის გამოც, შესაძლოა, Coca-Cola-ს იმ ბოთლების გაყიდვიდან ამოღება მოუწიოს, სადაც ხვიჩა კვარაცხელიაა გამოსახული.

გავრცელებული ინფორმაციით, ხვიჩა კვარაცხელიას 100%-იან სარეკლამო უფლებებს Napoli ფლობს. ნეაპოლური კლუბის ხელმძღვანელობა კი Coca-Cola-ს და საქართველოს ფეხბურთის ფედერაციის მიერ დაგეგმილი მარკეტინგული კამპანიის შესახებ ინფორმირებული არ ყოფილა. სწორედ ამას უკავშირდება ნეაპოლური კლუბის პრეტენზიები ქართულ მხარესთან.

იტალიური გამოცემა Gazzetta-წერს, რომ Coca-Cola-ს ეტიკეტზე გამოსახული კვარაცხელიას ეტიკეტები არის პროტოტიპი, რომელიც ჯერ არსად გავრცელებულა. ფეხბურთელის იმიჯის გამოყენებასთან დაკავშირებით Napoli Coca-Cola-ს მარკეტინგის წარმომადგენლებთან როგორც საქართველოში, ასევე ატლანტას შტაბ-ბინაში მოლაპარაკებებს აწარმოებს, რადგან, როგორც წესი, კონტრაქტებში, რომლებსაც კლუბის წევრები აწერენ ხელს, ამ ტიპის უფლებების კლუბისთვის გადაცემაა გათვალისწინებული.

„კომერსანტი" 2 დღეა ცდილობს საკითხის საქართველოს ფეხბურთის ფედერაციასთან და Coca-Cola-სთან გარკვევას, მაგრამ ჯერჯერობით არც ფედერაციის და არც „კოკა კოლა ბოთლერს ჯორჯიას" წარმომადგენლები კონტაქტზე არ გამოდიან.
წყარო: "კომერსანტი"