სიახლეები / ჩოგბურთი / მსოფლიო ჩოგბურთი
"აბუ-დაბის" ტურნირის მეორე სათამაშო დღის შედეგები და ხვალინდელი განრიგი

დღეს „აბუ-დაბის“ საჩვენებელი ტურნირის ფარგლებში, მეორე სათამაშო დღე დასრულდა.

„Mubadala Tennis World Championship“-ზე სამი შეხვედრა გაიმართა.

პირველ შეხვედრაში, მსოფლიოს ნომერ მე-10 ჩოგანი ესპანელი პაბლო კარენო-ბუსტა რუს ჩოგბურთელ ანდრეი რუბლიოვს დაუპირისპირდა, რომელიც „ATP“ რეიტინგში 39-ე პოზიციას იკავებს. დაპირისპირება 1 საათისა და 7 წუთის განმავლობაში გაგრძელდა და საბოლოოდ ანდრეი რუბლიოვის გამარჯვებით დასრულდა. რუსმა ჩოგბურთელმა მეტოქე ორ სეტში დაამარცხა, ანგარიშით 6-4, 6-2. შედეგად, ანდრეი „აბუ-დაბის“ საჩვენებელი ტურნირის მე-5 ადგილზე აღმოჩნდა, კარენო ბუსტა კი ბოლო მე-6 ადგილს დასჯერდა.

მეორე მატჩში, სამხრეთ აფრიკელი კევინ ანდერსონი, რომელიც „ATP” რეიტინგში მე-14 ადგილს იკავებს, დაუპირისპირდა ავსტრიელ ჩოგბურთელ დომინიკ ტიმს. ეს უკანასკნელი მსოფლიოს მე-5 ჩოგანია. მატჩი ანდერსონის გამარჯვებით დასრულდა 2 სეტში, ანგარიშით 7-6(6), 6-4. დაპირისპირება 1 საათისა და 32 წუთის განმავლობაში გაგრძელდა. აქვე აღვნიშნავთ იმ ფაქტსაც, რომ კევინ ანდერსონსა და დომინიკ ტიმს შორის პირად შეხვედრებში ანგარიში 8-0 გახდა სამხრეთ აფრიკელის სასარგებლოდ!

მესამე მატჩში რობერტო ბაუტისტა-აგუტის მოწინააღმდეგე ბრიტანელი ჩოგანი ენდი მარი გახლდათ. ამ უკანასკნელმა, აღნიშნულ ტურნირზე, ნოვაკ ჯოკოვიჩი ჩაანაცვლა - სერბს ისევ მარჯვენა იდაყვის ტრავმა აწუხებს. მსოფლიოს ნომერ მე-20 ჩოგანმა ესპანელმა რობერტო ბაუტისტა-აგუტმა ბრიტანელი მოწინააღმდეგე 6-2 ანგარიშით დაამარცხა, ვინაიდან მატჩი ერთ სეტიანი ფორმატით ჩატარდა. საგულისხმოა ისიც, რომ ამ ეტაპზე, ენდი მარი მსოფლიოს მე-16 ჩოგანია. მატჩი 40 წუთის განმავლობაში გრძელდებოდა.

ხვალ, „აბუ-დაბის“ საჩვენებელ ტურნირზე 2 მატჩი გაიმართება.

პირველ შეხვედრაში, დომინიკ ტიმი ენდი მარის დაუპირისპირდება. მატჩში მე-3 და მე-4 ადგილოსნები გამოიკვეთება.

ფინალში კი კევინ ანდერსონი რობერტო ბაუტისტა-აგუტს შეხვდება.

„აბუ-დაბის“ ტურნირის ბოლო სათამაშო დღე თბილისის დროით 17:00 საათზე დაიწყება.








კომენტარის დამატება