ქართველი ძიუდოისტები მსოფლიოს ჩემპიონატს სამხრეთ კორეით გახსნიან

ქართველი ძიუდოისტები მსოფლიოს ჩემპიონატს სამხრეთ კორეით გახსნიან

30-10-2010, 11:22

როგორც იქნა დაზუსტდა ძიუდოში მსოფლიოს გუნდური ჩემპიონატის მონაწილე ნაკრებთა საბოლოო სია. შეჯიბრს, რომელსაც 30-31 ოქტომბერს თურქეთის ქალაქი ანთალია უმასპინძლებს, საქართველოს ნაკრები სამხრეთ კორეასთან შეხვედრით გახსნის. გამარჯვების შემთხვევაში კი ნახევარფინალში, რუსეთისა და იაპონიის წყვილიდან გასულს დაუპირისპირდება.

“გუნდურ ჩემპიონატში მონაწილეობას 8 ქვეყნის ნაკრები მიიღებს. კენჭისყრამდე ორგანიზატორებმა პირველი-ოთხი გუნდი განთესეს. საქართველოს მეოთხე ნომერი მიანიჭეს და ბადეში პირველ ნომრად განთესილ იაპონიასთან ჩასვეს. მეორე მხარეს კი მეორე-მესამე ნომრები – საფრანგეთი და მონღოლეთი. საწყის ეტაპზე სამხრეთ კორეას დავუპირისპირდებით, იაპონია რუსეთს შეხვდება, საფრანგეთი – ბრაზილიას, მონღოლეთი – თურქეთს” – უთხრა “მსოფლიო სპორტს” საქართველოს ძიუდოს ფედერაციის პრეს-სამსახურის ხელმძღვანელმა ზურა უსუფაშვილმა.

30 ოქტომბერს ანთალიურ ტატამზე ქალები გავლენ. მსოფლიოს გუნდური ჩემპიონობისთვის აქაც 8 გუნდი იბრძოლებს. მამაკაცები კი 31-ში იჭიდავებენ. აქვე შეგახსენებთ, რომ საქართველოს ნაკრების მთავარმა მწვრთნელმა სოსო ლიპარტელიანმა თურქეთში 7 შეგირდი ჩაიყვანა. 66 კილოგრამში დავით ასუმბანი იჭიდავებს, 73-ში – ნუგზარ ტატალაშვილი, 81-ში – ავთანდილ ჭრიკიშვილი და ხვიჩა ხუციშვილი, 90-ში – ვარლამ ლიპარტელიანი, +90-ში კი ზვიად ხანჯალიაშვილი და ლაშა გუჯეჯიანი.
საქართველოს ძიუდოისტთა ნაკრები მსოფლიოს მოქმედი გუნდური ჩემპიონია. ტიტული 2008 წელს, შოთა ხაბარელის ხელმძღვანელობით, ტოკიოში მოიპოვა.

მოგეწონათ ჩვენ მიერ შემოთავაზებული სტატია? გთხოვთ მოიწონოთ ან გააზიაროთ :
ინფორმაცია
ჯგუფ სტუმარი-ის წევრებს არ აქვთ კომენტარის დატოვების უფლება.

რეკლამა

შემოგვიერთდით