ბრესტს" აღარ აპატიეს

სიახლეები / ფეხბურთი / უცხოური ფეხბურთი 22-ნოე, 16:469 beqa_beqa 1643


ზედიზედ მე-3 შეხვედრაში ქულების დაკარგვამ და აქედან ორი თამაშის წაგებამ პირველი ლიგის ახალწვეული “ბრესტი”, როგორც იქნა, ლიდერობიდან ჩამოაქვეითა, თან ერთბაშად 5 საფეხურით. ალექს დუპონის გუნდის ხარჯზე, ცხრილში თითო საფეხურით წინ წაწევა “ლილმა”, “მონპელიემ”, პსჟ-მ, “მარსელმა” და “ბრესტის” მძლეველმა “რენმა” მოახერხეს.
7-ტურიანი შესვენების შემდეგ, ცხრილის სათავეში კვლავ ორხელისუფლებიანობაა. ბურთების უკეთესი შეფარდების გამო, პირველ ადგილს “ლილი” იკავებს, რომელსაც ყველაზე ხანგრძლივი წარმატებული სერია აქვს – რუდი გარსიას გუნდმა ბოლო 3 მატჩი მოიგო. მე-14 ტურში, “ლილმა” 3 ქულა “მონაკოსთან” მოიპოვა. ანგარიში, 39-ე წუთზე, შორეული დარტყმისა და მეკარის შეცდომის წყალობით ფრაუმ გახსნა, საგოლე პასი კი ანგარიშზე მატჩის საუკეთესო ფეხბურთელმა, ედენ აზარმა ჩაიწერა. მე-2 ტაიმი ათიოდ წუთის დაწყებული იყო, როდესაც სტუმართა მარჯვენა მცველმა, ადრიანო პერეირამ, მაკრატელა დარტყმით ბრწყინვალე გოლი გაიტანა და ანგარიში გაათანაბრა, მაგრამ 78-ე წუთზე, აზარის მორიგ გადაცემას უკვე ობრანიაკი გამოეხმაურა და წერტილი დასვა მატჩში, რომელშიც მისი გუნდი დიდ უპირატესობას ფლობდა.
“ლილს” ერთპიროვნულად გალიდერების საშუალება არ მისცა “მონპელიემ”, რომელმაც ზედიზედ მეორედ იმარჯვა. შაბათს გამართულ მატჩში, რენე ჟირარის გუნდმა “ნიცა” დაამარცხა გასვლაზე მინიმალური სხვაობით. ერთადერთი და 3 ქულის მომტანი გოლი სტუმრებმა 83-ე წუთზე გაიტანეს, როდესაც შეტევის მარცხენა ფლანგიდან, ესტრადას მიერ ჩაწოდებულ ბურთს ჟირუ გამოეხმაურა და თავური დარტყმით აიღო მასპინძელთა კარი.
როგორც იქნა, წააგო “ლანსმა”. ჟან ვალემის გუნდს, გუშინდლამდე, 5-მატჩიანი წაუგებელი სერია კი ჰქონდა, მაგრამ პა-დე-კალელები მაინც გასავარდნ ზონაში იმყოფებოდნენ. “ლანსი” მორიგ წარმატებულ თამაშთან ახლოსაც იყო, მაგრამ “ლიონთან” პირველი ტაიმის მოგების შემდეგ, 3 უპასუხო გოლი გაუშვა და საბოლოოდ უქულოდ დარჩა. ანგარიში მასპინძლებმა 24-ე წუთზე გახსნეს, როდესაც მეტოქე გუნდის მცველების შეცდომის შემდეგ მეკარესთან პირისპირ გასულმა აკალემ დაარტყა ზუსტად. მე-2 ტაიმი დაახლოებით 20 წუთის დაწყებული იყო, როდესაც გომისმა მაკუნის გადაცემას შეუჩერებლად დაჰკრა ფეხი და ანგარიში გაათანაბრა. 73-ე წუთზე, მან უკვე გურკუფის გადაცემით იხეირა და ამჯერად ზუსტი თავურით გუნდი წინ გაიყვანა. 89-ე წუთზე, მაკუნმა მე-2 შედეგიანი გადაცემა ჩაიწერა აქტივში, გაატანინა რა შეცვლაზე შესულ ლისანდრო ლოპესს, მაგრამ უნდა აღინიშნოს, რომ პასის მომენტში, არგენტინელი თამაშგარე მდგომარეობაში იყო.
არასტაბილურად თამაშს განაგრძობს “პარი სენ ჟერმენი”. დედა-ქალაქელებს ოთხმატჩიანი წაუგებელი სერია კი აქვთ, მაგრამ უკვე 11 ტურია მათ ყოველ მოგებას ქულების დაკარგვა მოჰყვება. ვინაიდან, წინა ტურში, ანტუან კამბუარეს გუნდს ფრე ჰქონდა ნათამაშები, ამჯერად მოგება უწევდა და პარიზელებმა მიაღწიეს კიდეც მიზანს, დაამარცხეს რა წაგებას დაჩვეული “კანი”. “პარკ დე პრენსზე” გამართულ მატჩში ანგარიში ოარომ გახსნა თავური დარტყმით პირველი ტაიმის მიწურულს. მე-2 ნახევარი ახალი დაწყებული იყო, როდესაც მეკარესთან პირისპირ გასულმა ერდინჩმა ტებო მოატყუა და ცარიელ კარში ბურთის გატანით პარიზელთა უპირატესობას სოლიდური სახე მისცა. 85-ე წუთზე, გათამაშების საუკეთესო ბომბარდირმა, ელ არაბიმ დაახლოებით 17 მეტრიდან კი გაიტანა გოლი, მაგრამ ვინაიდან ანგარიში მეტჯერ აღარ შეცვლილა, მისმა ზუსტმა დარტყმამ “კანი” ზედიზედ მე-4 მარცხისგან ვერ იხსნა.
ტურის ყველაზე უხვგოლიანი შეხვედრა გაიმართა აშკარა აუტსაიდერ “არლ-ავინიონსა” და ექს-ჩემპიონ “ბორდოს” შორის. ფარუკ ჰადიბეგის გუნდმა, მიმდინარე გათამაშებაში მეორედ გაიტანა ერთ მატჩში 2 გოლი, მაგრამ საპასუხოდ 4 გაუშვა და ბოლო 3 შეხვედრაში პირველად დარჩა უქულოდ. პირველ ტაიმში, მასპინძლები უპირატესობას ფლობდნენ და დაახლოებით 15 წუთი იგებდნენ კიდეც შეხვედრას, მაგრამ 35-ე წუთზე, სადავო სიტუაციაში, თერთმეტმეტრიანის დანიშვნასა და ლაურენტის გაძევებას მოდესტემ ზუსტი დარტყმა მოაყოლა, 4 წუთში კი გუფრანმაც გაიტანა ცარიელ კარში და უკვე სტუმრები დაწინაურდნენ. 59-ე წუთზე, ფაქტობრივად ცარიელ კარში, უკვე მოდესტემ გაიტანა გოლი, რომელმაც 88-ეზე ჰეთ-თრიკი შეასრულა და ერთ წუთში ბუზას მიერ გატანილ ბურთს პრაქტიკული მნიშვნელობა დაუკარგა


მოგეწონათ ჩვენს მიერ შემოთავაზებული სტატია? გთხოვთ დააჭიროთ ღილაკს:













მოიწონეთ სტატია


კომენტარები
გაუზიარეთ მეგობრებს
მსგავსი სიახლეები
beqa_beqa 22 ნოემბერი 2010 17:13
აუფ არადა რა მაგად დაიცყეს



შემოგვიერთდით
რეკლამა
არქივი
სექტემბერი 2020 (137)
აგვისტო 2020 (153)
ივლისი 2020 (167)
ივნისი 2020 (111)
მაისი 2020 (125)
აპრილი 2020 (204)
სიტი-რეალი