ოლიმპიურმა კომიტეტმა სტიპენდიანტი სპორტსმენები დაასახელა

სიახლეები / სხვა სახეობები / ოლიმპიური 11-ნოე, 20:409 Sportnews 2019


ლონდონის 2012 წლის ოლიმპიური თამაშებისთვის მოსამზადებელ პერიოდში, 30 ქართველი სპორტსმენი ოლიმპიური სოლიდარობის სტიპენდიას მიიღებს. საქართველოს ეროვნული ოლიმპიური კომიტეტის ოფისში, დღეს გამართულ პრესკონფერენციაზე, ის 15-კაციანი სია გამოცხადდა, რომელთა სტიპენდიებიც ოლიმპიური სოლიდარობის პროგრამამ ოფიციალურად დაადასტურა. ეროვნული ოლიმპიური კომიტეტის ხელმძღვანელთა გადაწყვეტილებით, ამ 15 სპორტსმენზე გაწერილი თანხა 30-ზე გადანაწილდება.

სრული განაცხადი სავარაუდოდ, რამდენიმე სახეობაში საქართველოს ჩემპიონატის ჩატარების შემდეგ ჩამოიწერება.
“ოლიმპიური სოლიდარობის პროგრამას რეკომენდაციით მივმართეთ. ლიცენზიის კანდიდატი 30 სპორტსმენიც შევარჩიეთ, მაგრამ ლიმიტი 15-ზე მოგვცეს და ჩვენც, მივაწოდეთ. ამ სიის შედგენამდე ძალიან ბევრი ვიფიქრეთ. უდიდესი პასუხისმგებლობა ავიღეთ და სხვანაირად რომ ვთქვათ, სერიოზული ფსონი გავაკეთეთ. თუკი თხუთმეტეულში შეყვანილი სპორტსმენები გაგვიმართლებენ და ლონდონის ოლიმპიადის ლიცენზიებს მართლა მოიპოვებენ, მაშინ 2016 წლის ოლიმპიური თამაშებისთვის მოსამზადებელ პერიოდში ოლიმპიური სოლიდარობა სტიპენდიანტთა ლიმიტს გაგვიზრდის. ცნობისთვის, 2008 წლის ოლიმპიადისთვის მოსამზადებელ პერიოდში 11 კაცზე გამოგვიყვეს დაფინანსება. აქვე მინდა დავაზუსტო, ამ სტიპენდიებს არანაირი კავშირი არ აქვს სპორტის სამინისტროსა და ეროვნული ოლიმპიური კომიტეტის მიერ დაწესებულ ხელფასებთან” – განაცხადა ოლიმპიური კომიტეტის პრეზიდენტმა გია ნაცვლიშვილმა და იქვე დასძინა, ჩემი გათვლით, ლონდონის ოლიმპიადისთვის 35-40 ლიცენზიას მოვიპოვებთო.
ოლიმპიური სოლიდარობის პროგრამა თანხას საქართველოში ყოველ სამ თვეში ერთხელ გადმორიცხავს. შესაბამისად, სპორტსმენები სტიპენდიას კვარტალურად მიიღებენ. თვეში თითო სტიპენდიანტის ანაზღაურება კი დაახლოებით 450-500 ლარს შეადგენს.
ძირითად სიაში სამ-სამი ძიუდოისტი და თავისუფალი და ბერძნულ-რომაული სტილით მოჭიდავეა შეყვანილი. მოკრივეებს ორი წარმომადგენელი ეყოლებათ, ხოლო ტყვიის მსროლელებს, ბატუტზე მხტომელებს, მშვილდოსნებსა და წყალში მხტომელებს – თითო-თითო. ყველაზე მოულოდნელი და სასიამოვნო განაცხადში რევაზ მინდორაშვილის გამოჩენაა. მოქმედ ოლიმპიურ ჩემპიონს ბოლო წლებში არც ერთ დიდ ტურნირში არ მიუღია მონაწილეობა. მკურნალობის საკმაოდ გრძელი კურსი ჩაიტარა და საჭიდაო წრეებში მისი აქტიური სპორტიდან წასვლაზეც ალაპარაკდნენ, მაგრამ როგორც ამ დღეებში გაირკვა, მომავალი ოლიმპიადის საგზურისთვის ბრძოლაში ჩაბმას აპირებს და ამის თაობაზე ოლიმპიური კომიტეტის ხელმძღვანელობასთანაც უსაუბრია.
პრესკონფერენციის ბოლოს, გია ნაცვლიშვილმა ჟურნალისტებს ორი საინტერესო ინფორმაციაც მიაწოდა. პირველი ძიუდოისტ ირაკლი ცირეკიძეს ეხება. ოლიმპიურმა კომიტეტმა ქუთაისელ ძიუდოისტს თბილისში ბინის საქირავებლად თანხა გამოუყო და ამიერიდან, მოქმედი ოლიმპიური ჩემპიონი დედაქალაქში ივარჯიშებს.
მეორე ინფორმაციის თანახმად კი, 12 ნოემბერს თბილისს ლეგენდარული სერბი კალათბურთელი ვლად დივაცი ესტუმრება. ამჟამად იგი სერბეთის ოლიმპიური კომიტეტს ხელმძღვანელობს და ქართველ კოლეგებს ეწვევა. 26-27 ნოემბერს სერბეთის დედაქალაქ ბელგრადში ევროპის ოლიმპიური კომიტეტების გენერალური ასამბლეა გაიმართება, რომელზეც 2015 წლის ევროპის ახალგაზრდული ოლიმპიური ფესტივალის მასპინძელი უნდა აირჩიონ. კანდიდატი ორია – თბილისი და ჩეხეთის ქალაქი ბრნო. ნაცვლიშვილის თქმით, ასამბლეის მასპინძელი ქვეყნის კეთილგანწყობის მოპოვება საბოლოო გამარჯვების მისაღწევად შეიძლება უმნიშვნელოვანესი ნაბიჯიც იყოს. ვლად დივაცი თბილისში 24 საათს დაჰყოფს. სპორტულ ობიექტებს დაათვალიერებს და სავარაუდოდ, ხელისუფლების წარმომადგენლებსაც შეხვდება.
დასასრულს, ისევ პრესკონფერენციის მთავარი თემა და ის 15 სპორტსმენი, რომლთაც ოლიმპიური სოლიდარობის პროგრამა სტიპენდიებს უწესებს:
ნინო სალუქვაძე (ტყვიის სროლა), გიორგი გოგშელიძე (თავისუფალი ჭიდაობა), მანუჩარ კვირკველია (ბერძნულ-რომაული ჭიდაობა), რამაზ ნოზაძე (ბერძნულ-რომაული ჭიდაობა), ვარლამ ლიპარტელიანი (ძიუდო), ლუბა გოლოვინა (ბატუტზე ხტომა), ოთარ თუშიშვილი (თავისუფალი ჭიდაობა), მანუჩარ ცხადაია (ბერძნულ-რომაული ჭიდაობა), ირაკლი ცირეკიძე (ძიუდო), ლევან წიკლაური (ძიუდო), კობა ფხაკაძე (კრივი), კახაბერ ჟვანია (კრივი), ჭოლა ჭანტურია (წყალში ხტომა), ხათუნა ნარიმანიძე (მშვილდოსნობა) და რევაზ მინდორაშვილი (თავისუფალი ჭიდაობა).


მოგეწონათ ჩვენს მიერ შემოთავაზებული სტატია? გთხოვთ დააჭიროთ ღილაკს:













მოიწონეთ სტატია


კომენტარები
გაუზიარეთ მეგობრებს
მსგავსი სიახლეები



შემოგვიერთდით
რეკლამა
არქივი
ოქტომბერი 2020 (184)
სექტემბერი 2020 (204)
აგვისტო 2020 (153)
ივლისი 2020 (167)
ივნისი 2020 (111)
მაისი 2020 (125)
სიტი-რეალი