თბილისის საქალაქო სასამართლოში ჩოგბურთელ ნიკოლოზ ბასილაშვილის საქმის განხილვა გრძელდება. ის ყოფილი მეუღლის მიმართ ფიზიკურ და ფსიქოლოგიურ ძალადობაშია ბრალდებული.
დღეს გამართულ პროცესზე სასამართლოს ჩვენება მისცა სასწრაფოს ექიმმა, რომელიც 2020 წლის 21 მაისს, ავჭალაში ინციდენტის ადგილზე გამოიძახეს და ნეკა დოროყაშვილის მდგომარეობა შეისწავლა.
დღევანდელი პროცესის დასრულების შემდეგ სასწრაფოს ექიმის ჩვენების შინაარსზე ბრალდებულის ადვოკატმა ისაუბრა.
ექიმის ჩვენებით ირკვევა, რომ ნეკა დოროყაშვილს ჰქონდა მცირე დაზიანება "კანის აქერცვლის სახით“, თუმცა "დაზარალებულმა ამ დაზიანების წარმომავლობა ვერ გაიხსენა“ - ამბობს ბასილაშვილის ადვოკატი.
მისივე თქმით, ექიმის გამოკითხვა მოწმობს, რომ ინციდენტის დღეს ნეკა დოროყაშვილი რაიმე სახის ფიზიკურ ტკივილს არ განიცდიდა.
დღეს, ასევე, დაიკითხა პოლიციის თანამშრომელი, რომელმაც პირველად გამოკითხა ნეკა დოროყაშვილი. პროკურორის თქმით, მოწმეებმა დაადასტურეს გამოძიების პროცესში გამოვლენილი გარემოებები, სადაც საუბარია როგორც ფიზიკურ, ისე ფსიქოლოგიურ ძალადობაზე.
ცნობისთვის: ბრალდების თანახმად, 2020 წლის 21 მაისს, თბილისში, ავჭალის დასახლებაში, ნიკოლოზ ბასილაშვილმა ურთიერთშელაპარაკების ნიადაგზე, ყოფილი მეუღლის ნეკა დოროყაშვილის მიმართ ფიზიკური ძალადობა განახორციელა. სამართალდამცველებმა ნიკოლოზ ბასილაშვილი 2020 წლის 22 მაისს დააკავეს. სასამართლომ ბასილაშვილის აღკვეთის ღონისძიების საკითხზე იმსჯელა და ის 100 000-ლარიანი გირაოს სანაცვლოდ გაათავისუფლა. სისხლის სამართლის საქმეზე გამოძიება გრძელდება.
"რუსთავი 2"
