„ვილიარეალისა“ და საქართველოს ეროვნული ნაკრების თავდამსხმელმა, გიორგი მიქაუტაძემ ესპანეთის სამეფო თასის 1/64-ფინალური ეტაპის შეხვედრაში სადებიუტო გოლი გაიტანა, ხოლო მისმა გუნდმა ქვედა ლიგის წარმომადგენელი „სიუდად დე ლუსენა“ სტუმრად 6:0 დაამარცხა.
„ვილიარეალის“ ბევრი წამყვანი ფეხბურთელის მსგავსად, მიქაუტაძემ მატჩი სათადარიგოთა სკამიდან დაიწყო და მოედანზე მეორე ტაიმში შევიდა. მან თავი 81-ე წუთზე გამოიჩინა და შეხვედრაში ანგარიში 5:0 გახადა.
მიმდინარე სეზონში, ყველა ტურნირის ეგიდით, გიორგი მიქაუტაძისთვის ეს მეხუთე გოლი იყო. მანამდე მან „ვილიარეალის“ მაისურით ესპანეთის ჩემპიონატში ორჯერ გაიტანა, ხოლო ერთხელ – ჩემპიონთა ლიგაზე. „ლიონის“ დატოვებამდე, აგვისტოში მან საფრანგეთის ჩემპიონატშიც მოახერხა თავის გამოჩენა.
„ვილიარეალის“ მეტოქე ესპანეთის სამეფო თასის 1/32 ფინალში მოგვიანებით, წილისყრის შემდეგ გაირკვევა.
