საქართველოს ეროვნული ნაკრების ნახევარმცველი გიორგი ქოჩორაშვილი მომდევნო მატჩს ლისაბონის „სპორტინგის“ ძირითად შემადგენლობაში ჩაატარებს, – ამის შესახებ ინფორმაციას პორტუგალიური გამოცემა „ლეონინო“ ავრცელებს.
„ესპანური „ლევანტედან“ „სპორტინგში“ სატრანსფერო „ფანჯრის“ მიწურულს გადასული ქართველი ფეხბურთელი ლისაბონში მარტივ პერიოდს არ გადის, თუმცა შესაძლოა, მისთვის ახალი ეტაპი დაიწყოს. ამის მიზეზი ჟოაო სიმოეშის მიღებული ტრავმაა, რაც გიორგი ქოჩორაშვილს დამატებით შესაძლებლობას აძლევს.
ბოლო დროს „სპორტინგის“ ძირითად შემადგენლობაში სწორედ 18 წლის სიმოეში თამაშობდა, შემდეგ მოდიოდა იაპონელი ჰიდემასა მორიტა, ხოლო მესამე ვარიანტი ქოჩორაშვილი იყო. ახლა კი, სიმოეშის ტრავმის ფონზე, გუნდის მთავარი მწვრთნელი რუი ბორჟესი უფრო მეტად მომთხოვნი გახდება ქართველი ნახევარმცველის მიმართ და დიდი ალბათობით, მას შანსს პირველივე წუთებიდან მისცემს 22 ნოემბერს პორტუგალიის თასის 1/16-ფინალში „მარინენსესთან“ მატჩში“, – წერს გამოცემა.
გიორგი ქოჩორაშვილი ამჟამად საქართველოს ნაკრებთან ერთად ბულგარეთშია და მსოფლიო ჩემპიონატის საკვალიფიკაციო ეტაპის ბოლო ტურის მატჩისთვის ემზადება, რომელსაც ვილი სანიოლის გაწვრთნილი გუნდი 18 ნოემბერს ადგილობრივ ნაკრებთან ჩაატარებს. ნახევარმცველმა ბოლო სანაკრებო შეხვედრა ესპანეთის წინააღმდეგ დისკვალიფიკაციის გამო გამოტოვა.
წყარო: 1tv.ge
