ლიონი გაძლიერებას განაგრძობს

გიორგი მიქაუტაძის „ლიონმა“ ერთ დღეში ორი ახალი ფეხბურთელი დაიმატა.

როგორც უკვე გაცნობეთ, ფრანგულმა კლუბმა ჩეხური „პლზენიდან“ ჩეხეთის ნაკრების 24 წლის შემტევი, პაველ შულცი, 10 მილიონ ევროდ შეიძინა.

მეორე ახალწვეული „ლივერპულის“ ყოფილი საყრდენი ნახევარმცველი, 22 წლის ტაილერ მორტონია. ტრანსფერი „ოლიმპიკს“ 15 მილიონი ევრო დაუჯდა, ხოლო ფეხბურთელთან ხუთწლიან კონტრაქტს მოეწერა ხელი.

შეთანხმების თანახმად, თუ „ლიონი“ მორტონს მომავალში 15 მილიონზე მეტი თანხით გაყიდის, „ლივერპული“ ამ სხვაობის 20%-ს მიიღებს. მორტონმა „ლივერპულის“ ძირითად გუნდში 5 შეხვედრა ჩაატარა, ხოლო ახალგაზრდულში — 6. გასულ სეზონს კი იჯარით „ჰალში“ ატარებდა.