ესპანურმა საფეხბურთო კლუბმა „გრანადამ“ და მოსკოვის „დინამომ“ შეთანხმებას მიაღწიეს მიმდინარე სეზონის ბოლომდე ფეხბურთელ ლუკა გაგნიძის იჯარაზე – ინფორმაციას ლა ლიგა 2-ის კლუბის პრესსამსახური ავრცელებს.
„ლუკა გაგნიძე (დაიბადა ქუთაისში 2003 წელს) საქართველოს ეროვნული ნაკრების ფეხბურთელია, რომელიც 2021 წლიდან მოსკოვის „დინამოში“ თამაშობს. „გრანადა“ მიესალმება გაგნიძეს და წარმატებებს უსურვებს მას „წითელ-თეთრი“ გუნდის შემადგენლობაში“, – წერია ესპანური კლუბის მიერ გავრცელებულ განცხადებაში.
ლუკა გაგნიძე 13 წლის ასაკიდან „დინამო თბილისის“ აკადემიაში ვარჯიშობდა, საიდანაც ძირითად გუნდში 2020 წელს დააწინაურეს. 2021 წელს მოსკოვის „დინამოსთან“ ხუთწლიანი კონტრაქტი გააფორმა, მაგრამ ამ გუნდში სათამაშო პრაქტიკა არ ჰქონდა და იჯარით ითამაშა „ურალში“, პოლონურ „რაკოვში“ და სამარის „კრილია სოვეტოვში“.
გაგნიძეს საქართველოს ყველა ასაკობრივ ნაკრებში იწვევდნენ. საქართველოს ახალგაზრდულ (U21) ნაკრებში ევრო 2023 და ევრო 2025-ის ფინალური ეტაპზე ითამაშა. საქართველოს ეროვნულ ნაკრებში დებიუტი 2023 წლის 25 მარტს მონღოლეთთან 6:1 მოგებულ ამხანაგურ მატჩში ჰქონდა.
წყარო: 1tv.ge-sport
