მიქაუტაძის ტრანსფერი „ვილიარეალის“ ისტორიაში ყველაზე ძვირად ღირებულია

Eagle Football Group-მა, რომლის მფლობელობაშიცაა „ლიონი“, გიორგი მიქაუტაძის „ვილიარეალში“ გადასვლის დეტალები გამოაქვეყნა და ცნობილი გახდა, რომ ესპანური კლუბის ისტორიაში ეს ყველაზე ძვირად ღირებული ტრანსფერია.

„ტრანსფერმარკტზე“ ბოლო განახლების შემდეგ მიქაუტაძის ტრანსფერის საბაზრო ღირებულებად 22 მილიონი ევროა მითითებული, ესპანურმა კლუბმა გარიგებაში 36 მილიონი ევრო გადაიხადა. ამ თანხაში შედის 5 მილიონი ევრო ბონუსების სახით. ამას გარდა, ფეხბურთელის მომდევნო ტრანსფერიდან „ლიონი“ 10%-ს მიიღებს.

ქართველი თავდამსხმელის ტრანსფერი ყველაზე ძვირად ღირებული აღმოჩნდა ესპანური კლუბის ისტორიაში, რომელიც ახალ სეზონში ჩემპიონთა ლიგაზე ითამაშებს, ევროპული ტიტულებიდან კი ერთხელ მოგებული აქვს ევროპა ლიგა (2020–21), ორჯერ – ინტერტოტოს თასი (2003, 2004 წლებში).