ლა ლიგის გადამწყვეტილება, რომლის მიხედვითაც, ესპანეთის ჩემპიონატის მიმდინარე სეზონის მე-17 ტურის მატჩი გიორგი მიქაუტაძის „ვილიარეალსა“ და „ბარსელონას“ შორის მაიამიში უნდა ჩატარებულიყო, გაუქმებულია.
„მაიამიში ჩასატარებელმა შეხვედრამ ესპანეთში გარკვეული გაუგებრობა გამოიწვია, რის გამოც გადაწყდა მისი გაუქმება. სამწუხაროა, რომ ეს ინიციატივა, რომელიც ესპანური ფეხბურთისთვის ისტორიულ და უპრეცედენტო შესაძლებლობად შეიძლებოდა ქცეულიყო საერთაშორისო დონეზე გაფართოების თვალსაზრისით, ვერ განხორციელდა.
საზღვარგარეთ ოფიციალური მატჩის გამართვა მნიშვნელოვანი ნაბიჯი იქნებოდა გლობალური განვითარების მიმართულებით, განსაკუთრებით ისეთ სტრატეგიულ ბაზარზე, როგორიც ამერიკის შეერთებული შტატებია. პროექტი სრულად შეესაბამებოდა ყველა ეროვნულ რეგულაციას და არ არღვევდა ტურნირის მთლიანობას, რაც არაერთმა შესაბამისმა ორგანომ დაადასტურა.
იმ პირობებში, როცა პრემიერლიგა და ჩემპიონთა ლიგა აგრძელებენ გავლენისა და შემოსავლების გაზრდას, მსგავსი პროექტები აუცილებელია ესპანური ფეხბურთის კონკურენტუნარიანობის შესანარჩუნებლად. ასეთი შესაძლებლობების დაკარგვა ნიშნავს დამატებითი შემოსავლებისა და კლუბების საინვესტიციო პოტენციალის შემცირებას“, – წერია ლა ლიგის ოფიციალურ განცხადებაში.
აღნიშნულ გადაწყვეტილებას დიდი უკმაყოფილება მოჰყვა ლა ლიგის კლუბებს შორის. გასული ტურის მატჩების დასაწყისში ფეხბურთელებიც კი მოედანზე პროტესტის ნიშნად არ მოძრაობდნენ.
შესაბამისად, „ვილიარეალისა“ და „ბარსელონას“ მატჩი 21 დეკემბერს კვლავ ესპანეთში გაიმართება.
წყარო: 1tv.ge-sport
