თორნიკე ძოწენიძე ბოლო 3 ტურია სლოვაკეთის უმაღლესი ლიგის სიმბოლურში ხვდება

ქართველი მცველი თორნიკე ძოწენიძე ბოლო 3 შეხვედრაა სლოვაკეთის უმაღლესი ლიგის ტურის სიმბოლურ ნაკრებში ხვდება.

თორნიკე სხვადასხვა პორტალებმა (Sofascore, Opta) სლოვაკეთის ჩემპიონატის ლიდერების, “ჟილინას”, “დუნაისკა სტრედასა” და “სპარტაკ ტრნავას” წინააღმდეგ გამოარჩიეს.

ძოწენიძე “ზემპლინ მიხალოვცეს” ღირსებას იცავს და ძირითადის უცვლელი წევრია. “მიხალოვცემ” ნოემბერში სატურნირო მდგომარეობა შედარებით გაიუმჯობესა და 12-გუნდიან ლიგაში ახლა მე-9 პოზიციაზეა. გუნდს შანსი აქვს, როგორც, საჩემპიონო, ასევე, გასავარდნ პლეი-ოფში მოხვდეს.

ძოწენიძე “დინამოს აკადემიის” აღზრდილია. სლოვაკეთში წასვლამდე “თელავსა” და გორის “დილაში” ასპარეზობდა.

თორნიკე 25 წლისაა და ვილი სანიოლს ნამდვილად შეუძლია, როცა ნაკრების დაცვის ხაზის გადახალისება დაიწყება, შანსი მისცეს.