ამერიკის შეერთებულ შტატებში მცხოვრებმა მარინე ძაგნიძემ, რომელიც უკვე 25 წელია ემიგრაციაში იმყოფება და არაერთი საქველმოქმედო ღონისძიების ავტორია, ამჯერად ქართველი ემიგრანტები პარამკლავჭიდში მსოფლიო ჩემპიონის, ვახტანგ ახობაძის ირგვლივ გააერთიანა.
აშშ-ში მყოფმა საქართველოს მოქალაქეებმა ვახტანგ ახობაძისთვის 5 500 დოლარი შეაგროვეს. აღნიშნულის შესახებ მარინა ძაგნიძე სოციალურ ქსელში წერს და აღნიშნავს, რომ ქველმოქმედების ამ ტემპმა და მასშტაბმა ყველა რეკორდი მოხსნა:
„არც ზელეს წკაპუნი ჩერდება ჩემს ტელეფონზე და ვერც მე ვიძინებ: ჩემი ვიდეოს ატვირთვიდან 12 საათში უძლეველმა ამერიკულმა ემიგრაციამ ვახოსთვის შეაგროვა $5,100.00.
ქველმოქმედების ამ ტემპმა და მასშტაბმა ყველა რეკორდი მოხსნა. თქვენ გაგიმარჯოთ, ხალხო!
სიყვარული გადაგვარჩენს! ძალა ჩვენშია!
მადლობა ყველას, ვინც გაავრცელეთ ინფორმაცია, მოაკელით თქვენს ოჯახებს ამ მაგარი ბიჭის გასახარებლად. სიკეთე არსად იკარგება, ასტრონომიულად მრავლდება და მადლი ცას სწვდება, მერე უკლებლივ ისევ ჩვენ გვიბრუნდება“ – წერს მარინე ძაგნიძე.
„მაგიური ციფრი დადო ქართულმა ამერიკულმა ემიგრაციამ – $5,500.00“, – აღნიშნავს მორიგ სტატუსში მარინე ძაგნიძე და შეგროვებული თანხის შესახებ განახლებულ მონაცემების შესახებ წერს.
წყარო: fortuna.ge/
