სტამბოლური „ბეშიქთაში“ იანვარში მინიმუმ სამი ახალი ფეხბურთელის დამატებას გეგმავს, რომელთა შორის მთავარი სამიზნე საქართველოს ნაკრებისა და „სენტ-ეტიენის“ შემტევი ზურიკო დავითაშვილია, - იუწყება Sporx-ი.
გავრცელებული ინფორმაციით, გუნდის მწვრთნელმა სერგენ იალჩინმა მარცხენა ფლანგზე არსებული პრობლემის მოსაგვარებლად დავითაშვილის ტრანსფერი მოითხოვა. როგორც ცნობილია, კლუბის პრეზიდენტი სერდალ აიდალი ნაახალწლევს დაუკავშირდება „სენტ-ეტიენს“ და ქართველი შემტევის შესაძენად თანხას არ დაიშურებს. დავითაშვილი გამოირჩევა დრიბლინგითა და ერთი ერთზე თამაშის უნარით.
24 წლის ფეხბურთელს „სენტ-ეტიენთან“ კონტრაქტი 2028 წლამდე აკავშირებს. მიმდინარე სეზონში ლიგა 2-ის 8 მატჩში მას 4 გოლი აქვს გატანილი, ხოლო transfermarkt-ის მიხედვით მისი საბაზრო ფასი 9 მილიონი ევროა.
„ბეშიქთაში“ ამჟამად თურქეთის ჩემპიონატში მეექვსე პოზიციაზეა (1 მატჩით ნაკლები ჩატარებული აქვს) და ლიდერ „გალათასარაის“ 9 ქულით ჩამორჩება.
