დღე, როდესაც ჯანო ანანიძემ ფეხბურთელის სიცოცხლე იხსნა

ზუსტად 2 წლის წინ, 2020 წლის ევროპის ჩემპიონატის საკვალიფიკაციო ეტაპზე, საქართველოს ნაკრების წინააღმდეგ თბილისში გამართულ მატჩში, შვეიცარიის ნაკრების მცველი, ფაბიან შერი ჯემალ ტაბიძესთან შეჯახების შედეგად, უგონო მდგომარეობაში აღმოჩნდა.

აღნიშნული შემთხვევა შეხვედრის 23-ე წუთზე, კუთხურის მოწოდების შემდეგ, საჰაერო ორთაბრძოლისას მოხდა. საბოლოოდ, "ნიუკასლის" უკანახაზელი ქართველთა ნახევარმცველმა, ჯანო ანანიძემ გადაარჩინა, რომელმაც შერს პირველადი დახმარება გაუწია, რის შემდეგაც შვეიცარიელი მალევე ფეხზე წამოდგა.

აღსანიშნავია, რომ ენის გადაყლაპვისა (რაც ხელს სუნთქვას უშლის) და სიკვდილთან თვალებში ჩახედვის მიუხედავად, 4-წუთიანი მკურნალობის შემდეგ, ფაბიანმა თამაშის გაგრძელება გადაწყვიტა, თუმცა, სოციალურ ქსელში, მატჩის მიმდინარეობისა და დასრულების შემდეგაც, მისთვის მოედანზე დაბრუნების უფლების მიცემა კრიტიკულად შეაფასეს.

შეჯახსების შემდეგ ტაბიძეც გაზონზე აღმოჩნდა და მაისურიც სისხლიანი ჰქონდა, თუმცა ისიც მალევე მომჯობინდა - ჯემალმა მინდორზე 60 წუთი დაჰყო, შემდეგ კი ადგილი საბა კვირკველიას დაუთმო.

"დინამო არენაზე" ჩატარებული შეხვედრა ვლადიმირ პეტკოვიჩის გუნდმა, სტივენ ცუბერისა და დენის ზაკარიას გოლებით, ანგარიშით, 2-0 მოიგო.