თბილისში, 27 წლის ყაზახეთის მოქალაქე, ჩინგიზ მუსადილიოვი, პროფესიონალი მოკრივის, სერიკ მუსადილიოვის ძმა, გარდაცვლილი იპოვეს.
ის ბოლოს 4 აგვისტოს ღამით, ქალაქის ცენტრში, ერთ-ერთ ღამის კლუბთან ნახეს, რის შემდეგაც მასთან კავშირი შეწყდა. შეშფოთებულმა ოჯახის წევრებმა პოლიციას მიმართეს.6 აგვისტოს მედიამ მუსადილიოვის დაღუპვის შესახებ გაავრცელა ინფორმაცია, რაც საქართველოში ყაზახეთის საელჩომაც დაადასტურა.
როგორც საქართველოს შინაგან საქმეთა სამინისტროში განუცხადეს „ეხო კავკაზას“, გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს. ეს მუხლი გამოიყენება იმ შემთხვევაში, როდესაც ცხედარს ძალადობრივი სიკვდილის ნიშნები არ აღენიშნება.
წინასწარი ინფორმაციით, მუსადილიოვი თბილისის ცენტრში, ჯავახიშვილის ქუჩაზე, სიმაღლიდან ვარდნის შედეგად დაიღუპა.
გარდაცვლილის ძმა, სერიკ მუსადილიოვი, ყაზახეთის ერთ-ერთი ყველაზე პერსპექტიული მძიმეწონოსანია პროფესიონალურ კრივში. მეტსახელად „პანდას“, ათზე მეტი ბრძოლა აქვს ჩატარებული პროფესიონალურ რინგზე, რომელთა უმეტესობა ნოკაუტით დაასრულა. სერიკმა ინსტაგრამის სთორიში დაწერა: „დაე, შენი სული სამოთხეში მოხვდეს, ძმაო.“
წყარო: palitravideo.ge
