ზაგრებში მიმდინარე მსოფლიოს ჩემპიონატზე ბერძნულ-რომაული სტილით ჭიდაობაში ვახტანგ ლოლუამ (55 კგ) ოქროს მედალი მოიპოვა.
ლოლუამ ასპარეზობა მერვედფინალიდან დაიწყო, ფინალამდე ჩინელი ხუოინ ში, რუმინელი დენის ფლორინ მიხაი და თურქი მუხამედ ჩაქირი დაამარცხა, გადამწყვეტ ბრძოლაში კი ირანელ ახმად ბალუტაკს 9:7 სძლია.
18 წლის ვახტანგ ლოლუა წარმოშობით ხობიდან არის. სწორედ იმ ქალაქიდან, საიდანაც ნუგზარ წურწუმია იყო. ანალოგიურ შედეგს 2019 წელს სწორედ წურწუმიამ მიაღწია და საქართველოს ოქრო მოუტანა. მას შემდეგ, 6 წელია ბერძნულ-რომაულ ჭიდაობაში მსოფლიოს ჩემპიონი არ გვყოლია.
"ფენომენალური 18 წლის, ვახტან ლოლუა! სადებიუტო მსოფლიო! მსოფლიო ჩემპიონი! იგივე ქალაქიდან, იგივე საჭიდაო სკოლიდან - ნუგოსთვის იყო ეს! პირველი ზარი ამაყ დედასთან... ემოციის გარეშე ამ სიხარულის, სიამაყის და გამარჯვების ყურება უბრალოდ შეუძლებელია. ჩვენ ახალი ვარსკვლავის დაბადების მომსწრე ვხდებით... მადლობა ვახო ამ ემოციისთვის" - წერენ ახალგაზრდა ჩემპიონზე სოციალურ ქსელში.
ჩემპიონმა გამარჯვება დაღუპულ მეგობარს ნუგზარ წურწუმიას მიუძღვნა:
"ძალიან გახარებული ვარ, შრომა დამიფასდა, მადლობა მწვრთნელებს, ექიმებს, ფედერაციას და გულშემატკივარს. კარგ სპორტსმენთან მომიწია ფინალში შეხვედრა, კარგი ბიჭია და რთული იყო ჩემთვის, როცა გადამწყვეტი ბრძოლაა, ყველაფერი უნდა ჩადო, რომ გამარჯვებული ჩახვიდე შენს ქვეყანაში. მომავალში კიდევ ვეცდები, შრომას არ დავაკლებ, რომ შემდეგ ასპარეზობებზეც გამარჯვება მოვუტანო ჩემს ქვეყანას. პირველი, რასაც გავაკეთებ საქართველოში ჩასვლისას, ნუგზარ წურწუმიას საფლავზე ავიტან ამ ქამარს" - თქვა გამარჯვების შემდეგ 18 წლის ლოლუამ.
წყარო: ambebi.ge
