ქეცბაია მზადაა ოქრიაშვილი გაუშვას - თორნიკეს რამდენიმე ვარიანტი აქვს

ფამაგუსტას „ანორთოსისი“ შესაძლოა მიმდინარე სატრანსფერო პერიოდში თორნიკე ოქრიაშვილმა დატოვოს. კვიპროსული მედია მოსალოდნელი ტრანსფერზე იტყობინება და წერს, რომ კლუბი მზადაა ქართველი ფეხბურთელის თაობაზე წინადადებები განიხილოს.

ოქრიაშვილით თურქული გუნდები ყოფილან დაინტერესებულნი, მაგრამ კონკრეტული სახელები უცნობია. გარდა ამისა, თორნიკეს ნიქოზიის „ომონიაც“ იწვევს და „ანორთოსისს“ მის სანაცვლოდ ბერძენი ნახევარმცველი ხარალამბოს მავრიასიც შესთავაზეს. თუმცა, ფამაგუსტელებმა „ოქრის“ სანაცვლოდ „ომონიადან“ ფრანგი ფეხბურთელი ერიკ ბოატეკი მოითხოვეს - ამ გარიგებაზე ნიქოზიელები არ ეთანხმებიან. ამრიგად, გარიგება შეფერხდა, მაგრამ არაა გამორიცხული ვითარება შეიცვალოს.

ზემოხსენებული ფაქტები მოწმობს, რომ თემურ ქეცბაია თანახმაა თანამემამულეს შეელიოს და მას წასვლის უფლება მისცეს. „ანორთოსისის“ დატოვების სურვილი 28 წლის ფეხბურთელსაც აქვს და კარიერის უკეთეს ლიგაში გაგრძელება სურს. ამიტომ, კონტრაქტის განახლებაზე უარს ამბობს, რომელიც სეზონის ბოლოს იწურება. აღნიშნულიდან გამომდინარე, „ანორთოსისში“ ურჩევნიათ, მას ახლავე შეელიონ, რომ ფინანსურად გარკვეული სარგებელი ნახონ.

თორნიკე ოქრიაშვილმა მიმდინარე სეზონში კვიპროსის ჩემპიონატში 8 მატჩი ჩაატარა და 4 გოლი გაიტანა. ქართველი შემტევი ტრავმირებულია და ნოემბრიდან მოყოლებული არ უთამაშია.